Braziliyalik Neymarning o‘yinga munosabatini o‘zgartirish ilojsizdek ko‘rinmoqda. Uning maydonda tez-tez yiqilishi hattoki, rossiyalik figurali uchish ustasi Yelena Tuktamishevani ham hayratga soldi.
«Neymar? Sen avvaliga o‘zingni xuddi o‘layotgandek ko‘rsatasan, keyingi lahzada esa hech narsa bo‘lmagandek oyoqqa turasan. Bunday qilish sira yarashmaydi. Hamma yiqilyapti, bu futbol emas...», - dedi Yurgen Klopp «PSJ» - «Liverpul» o‘yini (2:1)dan so‘ng braziliyalik hujumchi harakatlariga e’tiroz ohangida.
Aytish joiz, Neymar o‘sha o‘yinda g‘alaba goli muallifiga aylandi va Yevropa CHL tarixidagi eng sermahsul braziliyalik bo‘lib oldi. Endi uning hisobida 31ta gol bor. Biroq odatga ko‘ra, hamma Neymarning golini emas, uning simulyasiyalarini muhokama qilmoqda. Gap shundaki, braziliyalik yulduz 90 daqiqa davomida 13 marta maydonga quladi, hakam shundan 8tasida o‘yin qoidasi buzilganini qayd etdi. O‘z o‘rnida yana bir fakt: «Liverpul» futbolchilari jami 20 marta qo‘pollik ishlatishdi.
- Mezbonlar hisobda oldinda borishdi va ochiqchasiga vaqt cho‘zishga urinishdi. Bunday holatlarda ayrimlar tez-tez maydonga qulab, kuchli og‘riq his qilishayotganini ko‘rsatishadi, - deya jig‘ibiyron bo‘ldi «Liverpul» himoyachisi Endryu Robertson.
- «PSJ»ning shunday uslubda necha daqiqa «o‘g‘irlagani»ni aytolmayman. Lekin bu juda yoqimsiz holat. «PSJ»ga qarshi o‘ynaydigan bo‘lsang, bunga ham tayyor turishing kerak».
Xususan, Neymarning xatti-harakatlari hattoki, taniqli figurachi Yelizaveta Tuktamishevaga ham yoqmadi. U «Tvitter»dagi sahifasida barchasini istehzo bilan baholadi: «PSJ» - «Liverpul» o‘yinini ko‘rdim. Neymar 90 daqiqa davomida maydonga shu qadar ko‘p quladiki, men butun faoliyatimda muz ustiga bundan kamroq yiqilgan bo‘lsam kerak...».
Tuktamisheva obunachilari munosabati
- Menimcha, Neymar figurali uchish bilan shug‘ullanganida, artistlik qobiliyati uchun ancha yuqori ball olardi.
- Unga futbol maydonidagi eng yaxshi aktyor sifatida «Oskar» mukofotini berish kerak.
- Aql bovar qilmas darajada iqtidorli futbolchi. Lekin bolalar va yosh klubdoshlari uchun dahshatli namuna...
- Yelizaveta, o‘zi kimsiz? Neymarni taniyman, ammo siz haqingizda hattoki, eshitmaganman. O‘ylashimcha, Neymar ham sizni bilmaydi...
