Xabaringiz bor, Milliy olimpiya qo‘mitasi Respublikamiz bo‘ylab keng miqyosdagi seleksiya ishlarini olib bormoqda. Yangi nomlarni kashf etish, terma jamoamiz uchun munosib nomzodlarni saralab olish maqsadida turli seleksion musobaqalar tashkil qilinmoqda. Ana shunday turnirlarning navbatdagisi bugun, 10 dekabr kuni Respublika ixtisoslashtirilgan olimpiya zaxiralari maktab-internatining yengil atletika manejida o‘tkazildi.
Musobaqaning tantanali ochilish marosimida O‘zbekiston Milliy olimpiya qo‘mitasi Bosh kotibi Jasur Matchanov, O‘zbekiston yengil atletika federasiyasi raisi Andrey Abduvaliyev va boshqalar ishtirok etishdi. Tadbir davomida Jasur Matchanov so‘zga chiqar ekan, huquqni muhofaza qiluvchi organlar xodimlari doimo yuqori jismoniy tayyorgarlikka ega ekanliklari, terma jamoamiz a’zoari orasida harbiy sportchilarning alohida o‘rni borligini qayd etib o‘tdi.
