MINSK – Belarusdagi Respublika davlat olimpiya zaxiralari bilim yurtidagi sport mutaxassislari tayyorlash tajribasi 2019 yildan boshlab O‘zbekistonda joriy etiladi. Bu haqda 10 dekabr kuni Jismoniy tarbiya va sport vazirligi matbuot xizmati xabar berdi.
Jismoniy tarbiya va sport vaziri Dilmurod Nabiyev Belarus davlatiga qilgan ishchi tashrif davomida aynan mazkur masala bo‘yicha Belarus Turizm va sport vazirligi vakillari bilan muzokara olib borgan. Vazir Belarusda yo‘lga qo‘yilgan sport mutaxassislarini tayyorlash tizimi bilan tanishgan.
O‘zbekiston delegasiyasi tomonidan mazkur bilim yurtiga o‘quvchilarni tanlab olish va tayyorlashda amal qilinayotgan tizim hamda tegishli yo‘nalishlari bo‘yicha o‘quv reja va dasturlar o‘rganilgan. Tomonlar belaruslik mutaxassislarni jalb qilgan holda O‘zbekistondagi olimpiya zaxiralari maktab-internatlarida ushbu tizimni joriy etish bo‘yicha kelishib olishgan.
Shuningdek, O‘zbekiston davlat jismoniy tarbiya va sport universiteti bazasida Belarus davlat jismoniy tarbiya va sport universiteti bilan hamkorlikda fakultet ochish orqali ta’lim dasturini yo‘lga qo‘yish bo‘yicha kelishuvga erishilgan.
2019-2020 o‘quv yilidan boshlab hamkorlikdagi fakultetda kadrlar tayyorlash “2+2” tartibida amalga oshiradi, bunda talabalarga 2 yil O‘zbekiston davlat jismoniy tarbiya va sport universiteti bazasida nazariy bilimlar o‘qitilsa, keyingi 2 yil Belarus davlat jismoniy tarbiya va sport universitetining o‘quv-amaliy (sport) bazalarida ta’lim beriladi.
Bundan tashqari, tomonlar qishki sport turlari bo‘yicha trenerlar tarkibini qayta tayyorlash va malakasini oshirish sohasida hamkorlikni rivojlantirish bo‘yicha ham kelishib olishdi.
