Avval xabar berganimizdek, tajribali murabbiy Viktor Jalilov kecha Andijonga tashrif buyurib, faoliyatini boshlab yubordi. Bugun “Andijon” futbol klubi vise-prezidenti Ma’rufjon Abdisalomov boshchiligida Bo‘ston dahasidagi “Viloyat bolalar va o‘smirlar futbol maktabi”da navbatdan tashqari yig‘ilish o‘tkazildi. Unda Ma’rufjon Jamoldinovich “Andijon” futbol klubi tasarrufidagi futbol maktab rahbariyati va murabbiylariga Viktor Jalilovni rasman tanishtirib, kelgusida hamkorlikda ish olib borish muhimligi aytib o‘tdi. Shuningdek futbol maktabida birdamlik bilan boshqa tashkiliy ishlarni ham asta-sekin yo‘lga qo‘yib borishlikni bildirdi.
Viktor Jalilov ham o‘z navbatida so‘zga chiqib, “Viloyat bolalar va o‘smirlar futbol maktabi”da faoliyat yuritayotgan murabbiylarga imkon qadar bor bilim va mahoratini berib borishga, viloyatdagi iqtidorli yoshlarni jiddiy nazoratga olish, ayniqsa kam ta’minlangan oilalarning farzandlariga e’tiborni yanada kuchaytirish zarurligini alohida ta’kidlab o‘tdi.
Endilikda haftaning har juma kuni Bo‘ston dahasidagi “Viloyat BO‘FM”da, haftaning har shanba kuni esa Sho‘rbuloq dahasidagi “Akademiya”da Viktor Jalilov boshchiligida murabbiylar o‘rtasida yig‘ilish o‘tkazilib, qilinayotgan ishlar hamda kelgusidagi rejalar bo‘yicha ochiq muloqot o‘tkazishga kelishib olindi.
Shu tariqa yig‘ilish ishchan va do‘stona ruhda yakunlandi.
"Andijon" matbuot xizmati.
