Avvalroq, Italiyaning Yuventus futbol klubi Toshkentda futbol akademiyasini ochishi haqida xabar bergan edik.
Bu haqda kelishuv 18 dekabr kuni Jismoniy tarbiya va sport vaziri Dilmurod Nabiyev va Yuventus klubi brendni boshqarish va rivojlantirish bo‘yicha ijrochi direktori Karolina Kiappero boshchiligidagi delegasiya o‘rtasidagi uchrashuv vaqtida imzolangan.
“Bizda futbolni yaxshi ko‘rishadi. Xususan, O‘zbekistonda Yuventus jamoasi muxlislari ham ko‘pchilikni tashkil etadi. Toshkentda ushbu klub akademiyasining tashkil etilayotgani barchamiz uchun quvonchli yangilik bo‘ldi.
Akademiyaning tashkil etilishi nafaqat ushbu muassasada, balki umuman o‘zbek futboliga jahonning ilg‘or tajriba va metodikalarini joriy etishi imkonini beradi, deb o‘ylayman. Vazirlik ham o‘z navbatida klub bilan hamkorlik qilishga hamda akademiyani har tomonlama qo‘llab-quvvatlashga tayyor”, degan Dilmurod Nabiyev.
O‘zbekistonning Rimdagi elchixonasi tashabbusi bilan O‘zbekistonga tashrif buyurgan Italiya futbol klubi vakillari bilan o‘tkazilgan muzokaralar jarayonida Turin politexnika universiteti bazasida “Yuventus akademiyasi”ni tashkil etish bo‘yicha o‘zaro anglashuv memorandumi imzolangan.
Yuventus brendni boshqarish va rivojlantirish bo‘yicha ijrochi direktori Karolina Kiappero O‘zbekistonda akademiyaning tashkil etishdan maqsad faqatgina uning o‘quvchilarini tayyorlash emas, balki o‘zbek yoshlariga futbol bilan professional tarzda shug‘ullanish imkoniyatini yaratish ekanligini ma’lum qildi.
Vazirlik matbuot xizmatining ma’lum qilishicha, akademiya 2019 yildan faoliyatini boshlashi rejalashtirilgan. Uning faoliyati oltita yo‘nalishni o‘z ichiga oladi. Bunga yil davomida o‘tiladigan treninglar, shug‘ullanish uchun maxsus oromgoh, yozgi oromgoh, o‘quv sessiyasi kabi turlar kiradi. Kelgusida O‘zbekistondagi akademiya Yuventus akademiyalari o‘rtasidagi jahon chempionatida ishtirok etadi.
Bugungi kunga kelib, “Yuventus akademiyasi” loyihasi Yevropa, Osiyo va Amerikada joylashgan 49 ta mamlakatda amalga oshirilib, 100 dan ortiq hududni va 15 ming nafardan ortiq bolalarni qamrab olgan.
