Superliga yo‘llanmasini qo‘lga kiritgan “Andijon” jamoasi dekabr oyida o‘z qarorgohida dastlabki o‘quv-yig‘in mashg‘ulotlarini olib bordi.

28 dekabr kuni jamoa a’zolari sharafiga bayram dasturxoni yozildi va shu kuni futbolchilarga yangi yil bayrami munosabati bilan qisqa muddatli ta’til e’lon qilindi.

“Burgutlar” endi rejaga ko‘ra, 3 yanvar kuni yana Andijonda yig‘iladi va 7 yanvardan yig‘in Toshkentga ko‘chadi.

Murabbiylar shtabining qaroriga ko‘ra, joriy mavsum “Andijon” sharafini himoya qilgan Siroj Hamroyev, Laziz Ubaydullayev, Sunnatilla Mamadaliyev, Qadamboy Nurmetov, Sunnatulla Abdullajonov, Jahongir Omonov, Nodirxon Kamolov, Shoxruh Boyqo‘ziyev hamda Elbek Otaqulov singari futbolchilar dastlabki yig‘inga taklif etilmadi.

Endilikda ushbu futbolchilar o‘zlarini boshqa jamoalarda sinab ko‘rishi mumkin. Fursati kelganda, yuqorida nomlari keltirib o‘tilgan futbolchilarning “Andijon” jamoasi ravnaqi yo‘lida qilgan xizmatlari uchun minnatdorchilik bildirib, ularning kelgusi faoliyatiga omad tilaymiz.

"Andijon" matbuot xizmati.