Hech qaysi futbolchi xatolardan sug‘urtalanmagan. Hatto yulduzlar ham. Bugun shunday alamli xatolarni amalga oshirgan mashhurlar haqida qisqacha…
Roberto Badjo – «Taqdir zarbasi»
1994-yildagi JCHda Italiya termasi juda ham ishonchli o‘yinlari bilan finalagacha yetib borgan edi. Jamoaning asosiy yulduzi Roberto Badjo deyarli har o‘yinda gol yoki assistni amalga oshirib, turnirning eng yaxshi o‘yinchisi bo‘lishga yaqqol da’vogar edi. Final o‘yinida Braziliya Italiyaga tengma-teng qarshilik ko‘rsatdi va o‘yin penaltilar seriyasigacha cho‘zildi. Braziliya o‘zining 5-penaltisini amalga oshirdi va hisobda oldinga chiqib oldi. Badjo esa so‘nggi nuqtada adashdi va tifozilarning nafratiga uchradi. Afsuski, shu omadsizlik uni butun umr ta’qib qildi va iqtidorini shubha ostida qoldirdi.
Stiven Jerrard – «Essiz ketgan APL sovrini»
Brenden Rodjers shogirdlari APL tugashiga 2 tur qolganida turnir jadvalida peshqadam edilar. «Chelsi» jamoasi bilan o‘yin. Birinchi taymning so‘nggi daqiqalarida so‘nggi himoyachi sifatida o‘ynayotgan Jerarrd to‘pni to‘xtata olmaydi, yetmaganiga sirpanib raqibiga oldirib qo‘yadi. Demba Ba esa osonlik bilan hisobni ochadi. Ikkinchi bo‘limda hujumga otilgan «Liverpul»ni «Chelsi» qarshi hujumda jazolaydi. Natijada tayyor chempionlik qo‘ldan chiqadi.
Jon Terri – «Moskvani yomon ko‘raman»
2008 yilda Moskvada bo‘lib o‘tgan finalni hamma eslasa kerak. 120 daqiqa durang bilan yakunlangan uchrashuv penaltilar seriyasiga ko‘chadi. Ikkala jamoadan ham hech kim adashmaydi. 5-penaltini amalga oshirishga Ronalduning asablari dosh bermaydi. Chex to‘pni qaytaradi. «Chelsi» agar penaltini aniq amalga oshirishsa, bas - YECHL g‘olibi! Zarbani jamoaning sardori, «Chelsi» muxlislarining kumiri, shaxsan Jon Terri berishi kerak edi. Jon zarba beradi, lekin sirranib to‘pni osmonga qarata tepib yuboradi. Ruhan tushkunlikka tushib qolgan «Chelsi» «6-5» hisobida penaltilar seriyasida mag‘lubiyatga uchraydi.
Yahyoxo‘ja Ulug‘xo‘jayev
