Dubay shahridan maxsus
Kecha, 11 yanvar kuni O‘zbekiston terma jamoasi a’zolari Dubay shahrida navbatdagi mashg‘ulotni o‘tkazdi. Mashg‘ulotdan keyin futbolchilar uchun "Crowne Plaza" mehmonxonasida o‘zbekona tadbir tashkil etildi.
Tadbirda O‘zbekiston futbol assosiasiyasi 1-vise-prezidenti Umid Ahmadjonov, O‘FA mutasaddilari va Osiyo Kubogini yoritish uchun O‘zbekistondan tashrif buyurgan OAV xodimlari, jumladan Stadion.uz internet nashri muxbiri Akmal Eshonxonov ham ishtirok etdi.
Umid Ahmadjonov futbolchilar bilan uchrashuv chog‘ida ularga Ummonga qarshi o‘yinda qozonilgan g‘alaba uchun minnatdorchilik bildirib, bu yog‘iga ham bo‘shashmasdan harakat qilish kerakligini, butun o‘zbek xalqi terma jamoamizdan g‘alabalar kutayotganini aytib o‘tdi.
Shundan so‘ng milliy terma jamoa ustozi Ektor Kuper OFK tomonidan taqdim qilingan Osiyo Kubogi bosh sovrini suvenirini Umid Ahmadjonovga topshirdi. O‘FA 1-vise-prezidenti ushbu Kubokning haqiqiysini Toshkentga olib borish milliy terma jamoamizga nasib qilishini tiladi.
Yig‘ilganlarga O‘FA Matbuot xizmati tomonidan tayyorlangan futbolchilarimizning ruhiyatini ko‘taradigan videorolik namoyish qilindi. Keyin estrada yulduzlari Jahongir Foziljonov, Qilichbek Madaliyev va Shuhrat Vohidov kabi san’atkorlar o‘z kuy qo‘shiqlari bilan yig‘ilganlar xush kayfiyat bahsh etishdi.
Tadbir so‘nggida futbolchi, murabbiy va OAV xodimlariga o‘zbek oshpazlari tomonidan tayyorlangan o‘zbek taomlari shohi - palov tortildi.
Bu tadbirni o‘tkazishdan asosiy maqsad yurtdan uzoqda bo‘lgan futbolchilarning Vatanga bo‘lgan sog‘inchlarini bir oz bo‘lsada kamaytirish, muhim o‘yin oldidan ularning kayfiyatini ko‘tarish, bir oila sifatida jipslashtirish va kelgusi g‘alabalar sari ruhlantirishdan iborat bo‘ldi.
