Oxirgi bir necha mavsumda Superligaga yo‘l olish uchun juda jiddiy harakat qilayotgan Farg‘onaning “Istiqlol” klubi ayni chog‘da yangi mavsumga qizg‘in hozirlik jarayonini olib bormoqda.
Jamoa dastlab 20-28 dekabr oralig‘ida yig‘ilgan edi. So‘ngra Yangi yil bayrami munosabati bilan o‘yinchilarga qisqa muddatli ta’til berilgan edi. Farg‘onaliklar 5 yanvar sanasidan e’tiboran ikkinchi o‘quv-mashg‘ulot yig‘iniga kirishishdi. Jamoa hozirda Farg‘ona shahrida joylashgan “Istiqlol” stadioni hududidagi sun’iy qoplamali maydonda mashg‘ulotlar olib bormoqda.
Yig‘in davomida bir qator sinov-nazorat uchrashuvlarida maydonga tushish ko‘zda tutilgan. Ertaga “Istiqlol” Namanganda “Navbahor”ga qarshi o‘rtoqlik uchrashuvi o‘tkazadi. 21-22 yanvar kunlari esa “Neftchi” va “Turon” klublariga qarshi ham nazorat o‘yinlari tashkil etiladi.
Yanvar oyi so‘nggidan boshlab esa jamoa “Farg‘ona viloyati hokimi kubogi”da ishtirok etadi.
