Xabar berib o‘tganimizdek, 1-2 fevral kunlari O‘zbekiston terma jamoasi poytaxtimizda «Devis Kubogi» doirasida Serbiyaga qarshi bahs olib boradi.
Raqiblar Toshkent shahriga yetib kelishgan. Serbiya terma jamoasi yurtimizga quyidagi tashrifda tashrif buyurgan: Dushan Layovich, Filip Krayinovich, Laslo Jere, Nikola Miloyevich va Viktor Troiski. Serbiyaliklar «Sahovat sport servis» majmuasida mashg‘ulotlarni olib bormoqdalar.
«Jamoada muhit ajoyib. Toshkentga kelib, mashg‘ulotlarni boshlab yubordik. Moslashish jarayoni oson bo‘layotgani yo‘q, ammo biz mashg‘ulotlarni yaxshi o‘tkazyapmiz va uchrashuvgacha tayyor bo‘lamiz. Eng asosiysi – biz g‘alabaga o‘zimizni tayyorlaganmiz», – deya Krayinovichning so‘zlaridan iqtibos keltirmoqda Serbiya tennis federasiyasi rasmiy sayti.
Eslatib o‘tamiz, musobaqa davomida O‘zbekiston terma jamoasi sharafini Denis Istomin, Humoyun Sultonov, Sergey Fomin, Sanjar Fayziyev va Jo‘rabek Karimov himoya qiladi.
Bugun soat 11:45 da terma jamoa sardorlari ishtirokida matbuot anjumani tashkil etiladi. Anjuman davomida terma jamoamiz sardori Farrux Do‘stov hamda serbiyaliklar vakili Nenad Zimonich jurnalistlar savollariga javob qaytaradi.
