Xabar berib o‘tganimizdek, bugun 8 fevral kuni xokkey bo‘yicha O‘zbekiston I chempionatining ochilish marosimi bo‘lib o‘tdi. «Ice City» muz saroyida tashkil etilgan ochilish marosimida Milliy Olimpiya qo‘mitasi prezidenti Umid Ahmadjonov ham ishtirok etdi.

MOQ rahbari tadbirda so‘zga chiqar ekan, ushbu tarixiy kun bilan barchani muborakbod etib o‘tdi va musobaqani rasman ochib berdi.

«Bugun o‘zbek sporti uchun tarixiy kun desak mubolag‘a bo‘lmaydi. Mustaqil O‘zbekiston tarixida xokkey bo‘yicha birinchi mamlakat chempionati start olmoqda.

Ayni paytda davlatimiz rahbari, muhtaram Shavkat Miromonovich tomonlaridan qishki sport turlarini rivojlantirishga alohida e’tibor qaratilmoqda. Markaziy Osiyoda yagona bo‘lgan «Humo» muz saroyining ochilish marosimiga ham oz vaqt qolmoqda. Ushbu arenaning foydalanishga topshirilishi yurtimizda qishki sport turlarining taraqqiyotiga katta turtki bo‘lishi shubhasiz.

Fursatdan foydalanib O‘zbekiston chempionatining barcha ishtirokchilariga omad tilayman. Musobaqada kuchlilar g‘alaba qozonsin. Ishonamanki, xokkey yurtimizda ham rivojlanib, yaqin yillarda sportchilarimiz xalqaro maydonlarda ham o‘z so‘zlarini ayta olishadi.

Xokkey bo‘yicha O‘zbekiston birinchi chempionatini ochiq deb e’lon qilaman», – dedi MOQ prezidenti.

Shundan so‘ng tadbir mehmonlari uchun ko‘rgazmali chiqishlar taqdim etildi. So‘ngra O‘zbekiston chempionati ishtirokchilari muzga chiqib kelishdi.

Tantanali ochilish marosimida Rossiyadan tashrif buyurgan faxriy mehmon, ikki karra Olimpiya o‘yinlari g‘olibi, afsonaviy Sergey Makarov ham o‘zining eng samimiy tilaklarini bildirib o‘tdi va musobaqa ishtirokchilariga omad tiladi.

Ma’lumot uchun, ilk marotaba tashkil etilayotgan mamlakat chempionatida «Binokor», «Humo», «Semurg‘» hamda «Toshkent» jamoalari ishtirok etishmoqda.

Musobaqada qayd etilayotgan natijalar bilan Milliy olimpiya qo‘mitasining rasmiy sayti orqali tanishtirib boramiz.