Barchamiz intiqlik bilan kutayotgan damlar yetib kelmoqda. Yana bahor, yana futbol. Keyingi haftadan PEPSI Superliga-2019 bahslari start oladi. Shiddat va’da qilayotgan o‘yinlar oldidan yaqinda PEPSI Superliga ishtirokchisiga aylangan “Dinamo” jamoasi bosh murabbiyi Davron Fayziyevning fikrlari bilan qiziqdik.

“Avvalambor, barchani bahorning kirib kelishi bilan tabriklayman. Bahoriy kayfiyat barchamizni yil davomida tark etmasin. Bahor bu nafaqat, ayollar bayrami yoki Navro‘z, balki futbol bayramining ham boshlanishidir.

Oldindan bizni juda qiziqarli mavsum kutib turibdi. PEPSI Superliga ishtirokchisiga aylanganimiz futbolsevar Samarqand xalqi uchun bahoriy bayramlar oldidan kutilmagan xushxabar bo‘ldi. Biz yil boshidan buyon jamoamiz bilan puxta tayyorgarlik ko‘rishga kirishganmiz. “Dinamo” PEPSI Superligada ham munosib bo‘lishga intiladi. Avvaldan oldimizga PEPSI Superligaga chiqish vazifasi qo‘yilgandi. Endi munosib bo‘lish uchun 10 kun vaqt qolgan bo‘lsada, biz bor imkoniyatimizni ishga solib tayyorgarlik ko‘rayapmiz.

Mavsumni qo‘shnilarimiz Qashqadaryoning “Nasaf” klubiga qarshi bahs bilan boshlaymiz. “Dinamo” – “Nasaf” o‘yini Samarqandda katta futbol bayrami bo‘ladi. Bu jamoalar o‘rtasidagi bahs doim qiziqarli kechgan. 1-turdagi raqibimiz “Nasaf” haqida faqat iliq fikrlarni aytish mumkin. Ular har qanday tarkibda bo‘lishmasin, o‘z uslublariga ega jamoadir.

Qisqa vaqt qolgan bo‘lsa-da, men bunday sinovlarga oldin ham tushganman, shu bois bu safar ham tayyorman. Yigitlarimizga ishonayapman. “Dinamo” bitta katta oilaga aylangan. Bizning eng katta kuchimiz birdamligimizda. Bilasiz, bizning minglab muxlislarimiz bor. Yangi mavsumda ham bizni qizg‘in qo‘llab-quvvatlab tursalar, biz ham ishonchni oqlab, PEPSI Superligada uyaltirmaymiz” – deydi “Dinamo” bosh murabbiyi Davron Fayziyev.

“Dinamo” klubi matbuot xizmati.