«Navro‘z» bayramiga bag‘ishlab yurtimiz bo‘ylab turli tadbirlar uyushtirilmoqda. Mamlakatimizda ommaviy sportni yanada rivojlantirish va aholi o‘rtasida sog‘lom turmush tarzini targ‘ib qilish maqsadida yurtboshimiz tashabbusi bilan «Navro‘z» xalqaro yarim marafoni tashkil qilindi.
Xalqaro musobaqa maqomida ilk bor o‘tkazilayotgan mazkur yirik sport tadbiriga qiziqish katta. Unda nafaqat yurtimiz, balki ko‘plab boshqa mamlakatlardan jami 2500 ga yaqin sportchilar tashrif buyurgan.
Bellashuv 2 xil masofada tashkil qilinadi. Dastavval, 9:00 da 21 kilometr masofaga yuguruvchilar startga chiqishsa, 10 daqiqa o‘tgach 5 kilometr masofaga yugurishni ixtiyor etganlar bahslarni boshlashadi.
