Halq orasida o‘z o‘rniga ega jurnalist Diyor Imomxo‘jayev PFLning keyingi rejalari haqida o‘zining rasmiy telegram sahifasida ma’lum qildi.
“PFL kubogi finali o‘tgan “Chig‘atoy” maydoni hozir zo‘r ko‘rinishda. OFK yordamida qilingan sun’iy maydonning bir qator afzalliklari bor. Masalan, to‘p ham, oyoq ham qorayib ketmaydi. Avvalgi sun’iy qoplamalar kabi maydon osti qora rezinkadan iborat emas. Bundan tashqari maydon quyosh nurida avvalgilarga o‘xshab keskin qizib ketmaydi.
Shu yilning o‘zida viloyatlardagi futbol akademiyalaridan yana 4 tasiga shunday maydonlar qurib beriladi. Rejaga Nukus, Toshkent, Namangan va Buxoro futbol akademiyalari kiritilgan.
Qo‘shimchasiga, Superliga klublarining PFL uchun to‘lab berayotgan badal pullari hisobidan O‘FA akademiyalariga boshqa maydonlar quriladi. Bir mavsumning o‘zida o‘ndan ziyod maydonlar qurish rejalashtirilgan va bu ish 2022 yilga qadar davom etadi. 2019 yil esa mamlakat tarixida ilk bor futbol akademiyalari o‘rtasida alohida turnir boshlanadi”, - deb yozadi Imomxo‘jayev.
