O‘zbekiston karate federasiyasining sobiq rahbari Nurxon Nafasov mamlakat Bosh prokurori Otabek Murodovdan yordam so‘radi.

Aytilishicha, O‘zbekiston Respublikasi Prezidenti xalq qabulxonasi tomonidan Toshkentda tashkil etilgan ommaviy qabul jarayonida O‘zbekiston Respublikasi Bosh prokurori Otabek Murodovning shaxsiy qabuli tashkil etilgan.

Bosh prokuror qabuliga kirgan Nurxon Nafasov karate sportini rivojlantirish uchun qilgan xizmatlari haqida to‘xtalib o‘tishi barobarida o‘ziga nisbatan qasddan ayb uyushtirilgani, joyi kerak bo‘lgani uchun uni qator muammolarga duchor qilishganini ma’lum qilib, nohaq ayblovlardan qutilishda yordam so‘radi.

O‘z navbatida, huquqiy idoralar xulosasi bo‘lmay turib uning sha’nini yerga urish maqsadida tarqatilgan ayblovlarga nisbatan Bosh prokuratura o‘z vaqtida munosabat bildirgani uchun minnatdorchilik bildirdi.

Ushbu masalani Bosh prokuror o‘z nazoratiga olib, ishga aloqador barcha holatlarni tekshirib, huquqiy baho berilishini ma’lum qildi.

Eslatib o‘tamiz, avvalroq Milliy olimpiya qo‘mitasi matbuot xizmati: “Nurxon Nafasovning kirdikorlari fosh bo‘ldi” sarlavhasi ostida xabar e’lon qilgan bo‘lib, Bosh prokuratura matbuot xizmati buni rad etgandi.

Ma’lumot o‘rnida, Nurxon Nafasov 2018 yilning 16 may kuni O‘zbekiston Milliy olimpiya qo‘mitasi majlislar zalida o‘tkazilgan O‘zbekiston karate Milliy federasiyasining navbatdan tashqari saylov Konferensiyasida ishtirokchilar tomonidan bir ovozdan qo‘llab quvvatlanib, 12 yillik tanaffusdan so‘ng yana O‘zbekiston karate Milliy federasiyasi prezidenti etib saylangan edi.