Ўзбекистон каратэ федерациясининг собиқ раҳбари Нурхон Нафасов мамлакат Бош прокурори Отабек Муродовдан ёрдам сўради.
Айтилишича, Ўзбекистон Республикаси Президенти халқ қабулхонаси томонидан Тошкентда ташкил этилган оммавий қабул жараёнида Ўзбекистон Республикаси Бош прокурори Отабек Муродовнинг шахсий қабули ташкил этилган.
Бош прокурор қабулига кирган Нурхон Нафасов каратэ спортини ривожлантириш учун қилган хизматлари ҳақида тўхталиб ўтиши баробарида ўзига нисбатан қасддан айб уюштирилгани, жойи керак бўлгани учун уни қатор муаммоларга дучор қилишганини маълум қилиб, ноҳақ айбловлардан қутилишда ёрдам сўради.
Ўз навбатида, ҳуқуқий идоралар хулосаси бўлмай туриб унинг шаънини ерга уриш мақсадида тарқатилган айбловларга нисбатан Бош прокуратура ўз вақтида муносабат билдиргани учун миннатдорчилик билдирди.
Ушбу масалани Бош прокурор ўз назоратига олиб, ишга алоқадор барча ҳолатларни текшириб, ҳуқуқий баҳо берилишини маълум қилди.
Эслатиб ўтамиз, аввалроқ Миллий олимпия қўмитаси матбуот хизмати: “Нурхон Нафасовнинг кирдикорлари фош бўлди” сарлавҳаси остида хабар эълон қилган бўлиб, Бош прокуратура матбуот хизмати буни рад этганди.
Маълумот ўрнида, Нурхон Нафасов 2018 йилнинг 16 май куни Ўзбекистон Миллий олимпия қўмитаси мажлислар залида ўтказилган Ўзбекистон каратэ Миллий федерациясининг навбатдан ташқари сайлов Конференциясида иштирокчилар томонидан бир овоздан қўллаб қувватланиб, 12 йиллик танаффусдан сўнг яна Ўзбекистон каратэ Миллий федерацияси президенти этиб сайланган эди.
