Харри Кейн номини «Барселона» клуби билан боғловчи миш-мишлар тарқалишда давом этмоқда. Душанба куни оқшом The Athletic нашри саҳифаларида инглиз ҳужумчисининг атрофидаги вазиятга оид мақола чоп этилди. Журналистлар Дэвид Орнштейн ва Пол Баллуснинг таъкидлашича, Кейн «Барселона»нинг қизиқишига қарамай, катта эҳтимол билан «Бавария» билан шартномасини узайтиради.

Қайд этилишича, Кейн Мюнхендаги ҳаётидан тўлиқ мамнун ва фаолиятини «Бавария»да давом эттиришга қарор қилган.

Бундан аввалроқ «Барселона» Кейн бўйича сўров юборган эди — ўшанда футболчининг вакиллари унинг келажаги фақатгина Жаҳон чемпионати якунланганидан кейин муҳокама қилинишини билдиришганди.

Маълумот учун, 32 ёшли Харри Кейннинг трансфер қиймати Transfermarkt портали мутахассислари томонидан 60 миллион еврога баҳоланмоқда.