Ҳужумчи Рафинья ажойиб спорт формасида ва «Барселона» у билан шартномани имкон қадар тезроқ узайтиришга умид қилмоқда. Бразилиялик футболчи меҳнат шартномасини узайтиришга принципиал жиҳатдан розилик берди, аммо El Nacional нашри ёзишича, битта муаммо мавжуд.
Гап шундаки, Саудия Арабистони клублари радарлардан йўқолгани йўқ ва улар Рафиньяга «Барселона»нинг қурби етмайдиган даражада катта маош тўлашга тайёр. Бу ҳолат бразилиялик футболчининг «Камп Ноу»даги шартномасини узайтириш жараёнини кечиктирмоқда, чунки Рафиньянинг атрофидаги кишилар имкон қадар манфаатлироқ шартларга эришишга ҳаракат қилишмоқда ва ҳеч қаерга шошилишмаяпти.
«Барселона» спорт директори Деку Рафиньянинг ҳозирги спорт формаси унга музокараларни кучли позицияда олиб бориш имконини беришини тушуниб турибди. Шу билан бирга, Ханс-Дитер Флик Саудия Арабистони клублари футболчининг хаёлини чалғитмаслиги учун шартнома масаласини имкон қадар тезроқ ҳал қилишни сўраган.
29 ёшли Рафиньянинг «Барселона» билан амалдаги шартномаси 2027/2028 йилги мавсум охиригача мўлжалланган.
