Xarri Keyn nomini «Barselona» klubi bilan bog‘lovchi mish-mishlar tarqalishda davom etmoqda. Dushanba kuni oqshom The Athletic nashri sahifalarida ingliz hujumchisining atrofidagi vaziyatga oid maqola chop etildi. Jurnalistlar Devid Ornshteyn va Pol Ballusning ta’kidlashicha, Keyn «Barselona»ning qiziqishiga qaramay, katta ehtimol bilan «Bavariya» bilan shartnomasini uzaytiradi.

Qayd etilishicha, Keyn Myunxendagi hayotidan to‘liq mamnun va faoliyatini «Bavariya»da davom ettirishga qaror qilgan.

Bundan avvalroq «Barselona» Keyn bo‘yicha so‘rov yuborgan edi — o‘shanda futbolchining vakillari uning kelajagi faqatgina Jahon chempionati yakunlanganidan keyin muhokama qilinishini bildirishgandi.

Ma’lumot uchun, 32 yoshli Xarri Keynning transfer qiymati Transfermarkt portali mutaxassislari tomonidan 60 million yevroga baholanmoqda.