"Барселона" дарвозабони Жоан Гарсия тиззасидан олган жароҳати сабаб тахминан уч ҳафта майдонга тушмайди.
AS маълумотига кўра, тиббий текширув 25 ёшли футболчининг ўнг тиззаси менискида кичик шикастланиш борлигини аниқлаган. Унга жарроҳлик амалиёти талаб қилинмайди.
Шу сабаб Гарсия 19 сентябрь куни Испания чемпионати доирасида сафарда "Севилья"га қарши ўйинда иштирок этмайди.
Дарвозабон терма жамоалар ўйинлари учун бериладиган танаффусдан кейин сафга қайтиши кутилмоқда. У 10 октябрь куни "Хетафе"га қарши учрашувда майдонга тушиши мумкин.
Гарсия жароҳатни 16 сентябрь куни "Расинг"га қарши 7:2 ҳисобида якунланган учрашувнинг биринчи бўлимида олган эди. Танаффусда "Барселона" бош мураббийи Ханс-Дитер Флик уни Войцех Шеснига алмаштирган.
Жоан Гарсия "Барселона" сафига 2025 йил ёзида келиб қўшилган. Унинг клуб билан шартномаси 2031 йил ўрталарига қадар амал қилади.
