Badiiy gimnastika bo‘yicha O‘zbekiston terma jamoasi 28 mart kuni Yevropaga yo‘l oladi. 8 aprelga qadar ko‘hna qit’aning bir yo‘la ikki davlatida sportning eng nafis turi bo‘yicha ketma-ket ikkita yirik musobaqa bo‘lib o‘tadi va ularning har ikkalasida mamlakatimiz vakillari ishtirok etishi rejalashtirilgan. Dastlab Fransiyaning Tye shahrida qizlarimiz xalqaro Gran-pri turnirida ishtirok etishadi. Mazkur musobaqa 1 aprel kuni nihoyasiga yetadi va shundan so‘ng gimnastikachilarimiz 3-8 aprel kunlari bo‘lib o‘tadigan jahon kubogi bosqichida qatnashish uchun Italiyaning Pesaro shahriga yo‘l olishadi.
Musobaqalarda ishtirok etadigan O‘zbekiston terma jamoasi tarkibi uch murabbiy va 8 sportchidan iborat bo‘lib, yurtimiz sharafini Nilufar Shomuradova, Dinara Ravshanbekova, Kseniya Aleksandrova, Sofiyabonu Kasimova, Kamola Irnazarova, Sevara Safoyeva va Sabina Tashkenbayeva va Yekaterina Fetisova himoya qilishadi.
Shuningdek, delegasiyamizdan ikki nafar hakam va shifokor ham o‘rin olgan.
Qizlarimizdan yaxshi natijalar kutib qolamiz.
