Ushbu haftada Superligada 3-tur uchrashuvlari bo‘lib o‘tadi.
Bilasiz, Superliga nomi ostida o‘tadigan 2019 yilgi mavsumidan boshlab, har bir tur uchrashuvlarida jamoalarning qanday rangdagi libosda maydonga chiqishlari Professional futbol ligasi tomonidan belgilab berilmoqda. Bunda mezbon jamoaning o‘z maydonida muxlislari qarshisida to‘p surishi inobatga olinib, birinchi galda mezbon klubning asosiy rangidagi libosda harakat qilishi ahamiyat kasb etadi. Shu boisdan har bir klub yangi mavsum uchun uy va safar liboslarini bir-biridan keskin farq qiladigan tarzda tanlashlariga urg‘u berildi.
3-tur doirasida AGMK o‘z maydonida “Qo‘qon-1912”ga qarshi bahs olib boradi. O‘yinda olmaliqliklar oq-oq-oq rangli liboslarda harakat qilishadi. Qo‘qonliklar esa to‘liq ko‘k rangdagi sport formalarida maydonga tushishadi.
Ta’kidlash joiz, AGMK — “Qo‘qon-1912” uchrashuvi 7 aprel, yakshanba kuni soat 17:15da Olmaliqda bo‘lib o‘tadi.
