“Yuventus” sobiq Bosh direktori Juzeppe Marotta “Real Madrid”dan hujumchi Krishtianu Ronalduning transfer qilinishiga qarshi bo‘lgani sabab jamoadan ketgani to‘g‘risidagi xabarlarga izoh berdi.   “Bu yolg‘on xabar. Shubhasiz, bizning bunday yirik shartnomaga pulimiz yo‘q edi. Futbolchi borasida A va B rejalarini tuzib prezident Andrea Anyelliga taqdim etdik va u ushbu transferni amalga oshirishimiz mumkin ekanligini ma’lum qildi.   Ronalduning jamoaga kelib qo‘shilishi – bu investorlar irodasi, men bunday qarorga kela olmas edim. Lekin, albatta, men Ronalduning transferiga qarshi bo‘lmaganman. Shu uchun ham Krishtianuni ko‘p vaqt davomida o‘rganib chiqdim. U – buyuk chempion, atrofdagilarga namuna sifatida ko‘rsatiladigan futbolchi. Men Turinda kelajagim boshqacharoq bo‘lishi mumkinligini kutdim, ammo keyin nimalar sodir bo‘lganidan xabaringiz bor”, – deydi Marotta.   Ma’lumot o‘rnida, Juzeppe Marotta 2010-2018 yillar davomida “Yuventus” klubi Bosh direktori lavozimida faoliyat yuritgan. Uning boshqaruvi davrida Andrea Pirlo, Arturo Vidal, Shtefan Lixtshtayner​, Klaudio Markizio, Paulo Dibala, Pol Pogba singari ko‘plab mashhur futbolchilar jamoaga kelib qo‘shildi. Qizig‘i, o‘yinchilarning aksariyat qismi turinliklar uchun mutlaqo tekinga tushgan.   Ta’kidlash joizki, Marotta 2018 yilning 31 oktyabrida “keksa-senyora” Bosh direktorligidan ketdi. Oradan bir oy o‘tib mutaxassis Milanning “Inter” klubida ushbu lavozimda faoliyatini boshladi.