Xabaringiz bor, joriy yilning 22-28 aprel kunlari yurtimizda velosportning shosse yo‘nalishi bo‘yicha Osiyo chempionati bo‘lib o‘tadi.
Qayd etish joiz, velosiped sportining shosse yo‘nalishi bo‘yicha kattalar, o‘smirlar va paralimpiyachilar o‘rtasida Osiyo chempionati O‘zbekistonda ilk marotaba o‘tkazilmoqda.
Mazkur musobaqa erkak va ayol sportchilar uchun 2020 yil Tokio (Yaponiya) shahrida bo‘lib o‘tadigan Olimpiya o‘yinlariga to‘g‘ridan-to‘g‘ri yo‘llanma (lisenziya) olish imkonini beradi.
Osiyo chempionatida Xitoy, BAA, Filippin, Yaponiya, Tailand, Janubiy Koreya, Vyetnam, Hindiston, Gongkong, Mo‘g‘uliston, Iordaniya, Eron, Saudiya Arabistoni, Yaman, Malayziya, Livan kabi 36 davlatdan 520 nafar sportchi ishtirok etishi rejalashtirilgan.
Musobaqa munosabati bilan Xalqaro velosipedchilar ittifoqi (UCI) prezidenti David Lapartyen va Osiyo Velosport Konfederasiyasi (ASS) prezidenti Osama Ahmad Al-SHafar rahbarligidagi nufuzli delegasiyalar tashrifi kutilmoqda.
Chempionat tadbirlari doirasida, aniqrog‘i 26 aprel kuni Toshkent shahridagi “International Hotel Tashkent” mehmonxonasida Osiyo velosiped sporti konfederasiyasining navbatdagi Kongressi ham o‘tkaziladi.
Poygalar dastlab to‘rt kun davomida G‘azalkent shahri hududida kechadi, so‘nggi ikki kun Toshkent shahridagi “International Hotel Tashkent” mehmonxonasi yonidan start oladi. Marra chizig‘i Toshkent viloyatining Bo‘stonliq tumanida joylashgan “Bildirsoy” dam olish oromgohi yaqinida va Sijjak qishlog‘i hududida belgilanadi. Musobaqa jarayonlarini vertolyotlar yordamida tasvirga olib, efirga uzatish rejalashtirilgan.
O‘zbekistonda jismoniy tarbiya va sport, xususan velosiped sportini yanada ommalashtirish va rivojlantirish, milliy terma jamoa zaxirasini shakllantirish bilan birga respublikamizda turizmni rivojlantirishda ham katta ahamiyatga ega.
