«PSJ» bosh murabbiyi Tomas Tuxel tobora jamoadan ajralib qolmoqda. Bu haqda Fransiyaning L'Equipe nashri xabar tarqatdi.

So‘nggi paytlarda ba’zi futbolchilar maydonda ishtiyoqsiz o‘ynayotgan mutaxassisga yoqmayapti. Jumladan, bir necha nafar o‘yinchi Liga-1 doirasidagi «Nant»ga qarshi bo‘lib o‘tgan safar bahsiga (2:3) borishdan bosh tortgan. Manbaga ko‘ra, Tuxel "PSJ" futbolchilari ustidan nazoratni, ular orasidagi hurmatni va yaxshi munosabatni yo‘qotib bormoqda.

Fransiya kubogi finalida «Renn»ga qarshi o‘yinda uchralgan mag‘lubiyatdan keyin (2:2, penaltilar bo‘yicha — 5:6) jamoa hujumchisi Neymar yosh futbolchilarni murabbiyga quloq solmayotganlikda aybladi. Braziliyalik futbolchining fikricha, ba’zi futbolchilar mashg‘ulotga jiddiy yondashishmagan, ular hali mavsum tugamasidan o‘zlarini ta’tilda deya his qilishgan.

«PSJ» ushbu mavsumda muddatidan avval Fransiya chempionligini qo‘lga kiritdi, ammo o‘zi ishtirok etgan qolgan 3ta musobaqada muvaffaqiyatsizlikka uchradi. Jamoa Yevropa chempionlar ligasi nimchorak final bosqichida «Manchester Yunayted»ga imkoniyatni boy berib qo‘ydi. Bundan tashqari, parijliklar Fransiya liga kubogi chorak final bosqichidan chiqib ketishdi. Fransiya kubogi finalida esa "Renn"ga penaltilar seriyasiga ko‘ra yutqazdi. Tuxel 2018 yilning yozida "PSJ"ni qabul qilgan edi.