Andijon viloyatida sportga, ayniqsa futbolga berilayotgan e’tibor havas qilsa arziydigan darajada.
O‘tgan hafta yangi qiyofa kasb etib, muxlis va sportchilar uchun barcha qulayliklarni o‘zida mujassam etgan “Sog‘lom avlod” stadionining ochilish marosimi bo‘lib o‘tdi. Andijon viloyati hokimi, viloyat futbol assosiasiyasi prezidenti Shuhratbek Abdurahmonovning tashabbusi bilan viloyatning barcha tuman va shaharlarida 2-liga musobaqalarida ishtirok etuvchi jamoalar shakllantirildi.
Bu yilgi viloyat birinchiligi musobaqalarida 22ta jamoa ishtirok etmoqda.
Kuni kecha Andijon viloyatining bir qator tuman va shaharlari stadionlarida musobaqaning ochilish marosimlari bo‘lib o‘tdi.
Bo‘z tumani o‘yingohida o‘tkazilgan ana shunday tadbirda tuman hokimi Inomjon Mamadaliyev so‘z olib, musobaqa ishtirokchilariga o‘z tabrigini yetkazdi. Shu kuni Bo‘z tuman havaskor yoshlaridan tashkil topgan “Saboteks” jamoasi “O‘zTongKO”ni qabul qildi.
Viloyatning bir qator tumanlari - Oltinko‘l, Xo‘jaobod, Baliqchi, Qo‘rg‘ontepa va Andijon shahar “Sho‘rbuloq” dahasidagi stadionlarda ham musobaqaning tantanali ochilish marosimlari va 1- tur o‘yinlari bo‘lib o‘tdi.
