Qoraqalpog‘istonning Mo‘ynoq tumanida 420 kilometrlik masofaga o‘tkazilgan ralli musobaqasi yakunlandi.
O‘zbekiston Respublikasi Bosh prokuraturasi, Jismoniy tarbiya va sport vazirligi hamda Turizmni rivojlantirish davlat qo‘mitasi hamkorligida o‘tkazilgan “Ralli Muynoq-2019” musobaqasi Orol dengizining qurigan tubi va Ustyurt tekisligi bo‘ylab tashkil qilindi.
Mo‘ynoq tumanida turizmni rivojlantirish hamda sog‘lom turmush tarzini targ‘ib etish maqsadida o‘tkazilgan musobaqaning yopilish marosimi 5 may kuni o‘tkazilib, g‘oliblarni Qoraqalpog‘iston Respublikasi Joqorg‘i Kengesi Raisi Musa Yerniyazov taqdirladi.
Ikki toifada o‘tkazilgan musobaqaning g‘oliblariga “Prezident sovg‘asi” sifatida “Neksiya” hamda “Spark” avtomobillari topshirildi.
“A-8” toifali, motor sig‘imi 1600 sm3 gacha bo‘lgan avtomobillar o‘rtasida jizzaxlik Furqat Axrorqulov g‘olib bo‘ldi va “Spark” mashinasini qo‘lga kiritdi.
“A-9” toifali, motor sig‘imi 2000 sm3 gacha bo‘lgan avtomobillar poygasida Andijon viloyatidan Sardor Xo‘jayev g‘olib bo‘ldi va “Neksiya” avtomashinasiga ega chiqdi.
Ikkinchi va uchinchi o‘rin egalariga mos ravishda 15 hamda 7 million so‘mdan pul mukofotlari topshirildi.
“Ralli Mo‘ynoq-2019” g‘oliblari:
“A-8” toifali avtomobillar o‘rtasida, motor sig‘imi 1600 sm3 gacha
1-o‘rin: Jizzax viloyatidan Furqat Axrorqulov (shturman: Asqar Hasanov), “Spark” avtomashinasi
2-o‘rin: Qoraqalpog‘iston Respublikasidan Timur Narziqulov (shturman: Qilichbek Narziqulov), 15 mln.so‘m
3-o‘rin: Andijon viloyatidan Ibrohim To‘ychiyev (shturman: Abdumannon Kazakov), 7 mln.so‘m
“A-9” toifali avtomobillar o‘rtasida, motor sig‘imi 2000 sm3 gacha
1-o‘rin: Andijon viloyatidan Sardor Xo‘jayev (shturman: Akmal Jo‘rayev), “Neksiya” avtomashinasi
2-o‘rin: Toshkent shahridan Jahongir Jabborov (shturman: Rauf Gasanov), 15 mln.so‘m
3-o‘rin: Namangan viloyatidan Alikay Xayrullayev (shturman: Rahim Shermatov), 7 mln.so‘m
