Қорақалпоғистоннинг Мўйноқ туманида 420 километрлик масофага ўтказилган ралли мусобақаси якунланди.
Ўзбекистон Республикаси Бош прокуратураси, Жисмоний тарбия ва спорт вазирлиги ҳамда Туризмни ривожлантириш давлат қўмитаси ҳамкорлигида ўтказилган “Ралли Муйноқ-2019” мусобақаси Орол денгизининг қуриган туби ва Устюрт текислиги бўйлаб ташкил қилинди.
Мўйноқ туманида туризмни ривожлантириш ҳамда соғлом турмуш тарзини тарғиб этиш мақсадида ўтказилган мусобақанинг ёпилиш маросими 5 май куни ўтказилиб, ғолибларни Қорақалпоғистон Республикаси Жоқорғи Кенгеси Раиси Муса Ерниязов тақдирлади.
Икки тоифада ўтказилган мусобақанинг ғолибларига “Президент совғаси” сифатида “Нексия” ҳамда “Спарк” автомобиллари топширилди.
“А-8” тоифали, мотор сиғими 1600 см3 гача бўлган автомобиллар ўртасида жиззахлик Фурқат Ахрорқулов ғолиб бўлди ва “Спарк” машинасини қўлга киритди.
“А-9” тоифали, мотор сиғими 2000 см3 гача бўлган автомобиллар пойгасида Андижон вилоятидан Сардор Хўжаев ғолиб бўлди ва “Нексия” автомашинасига эга чиқди.
Иккинчи ва учинчи ўрин эгаларига мос равишда 15 ҳамда 7 миллион сўмдан пул мукофотлари топширилди.
“Ралли Мўйноқ-2019” ғолиблари:
“А-8” тоифали автомобиллар ўртасида, мотор сиғими 1600 см3 гача
1-ўрин: Жиззах вилоятидан Фурқат Ахрорқулов (штурман: Асқар Ҳасанов), “Спарк” автомашинаси
2-ўрин: Қорақалпоғистон Республикасидан Тимур Нарзиқулов (штурман: Қиличбек Нарзиқулов), 15 млн.сўм
3-ўрин: Андижон вилоятидан Иброҳим Тўйчиев (штурман: Абдуманнон Казаков), 7 млн.сўм
“А-9” тоифали автомобиллар ўртасида, мотор сиғими 2000 см3 гача
1-ўрин: Андижон вилоятидан Сардор Хўжаев (штурман: Акмал Жўраев), “Нексия” автомашинаси
2-ўрин: Тошкент шаҳридан Жаҳонгир Жабборов (штурман: Рауф Гасанов), 15 млн.сўм
3-ўрин: Наманган вилоятидан Аликай Хайруллаев (штурман: Раҳим Шерматов), 7 млн.сўм
