«Барселона» клуби келаётган ёзги трансфер ойнаси учун асосий вазифасини белгилаб олди — жамоа марказий ҳужумчи чизиғини кучайтириши зарур.
Каталонияликлар анчадан бери «Атлетико» Мадрид аъзоси Хулиан Альваресга қизиқиш билдириб келаётган эди. Аргентиналик форвард ҳамон асосий номзод бўлиб турибди, бироқ унинг трансферини амалга ошириш, айниқса молиявий томонлама, анча мураккаб кечиши кутилмоқда.
El Nacional нашрининг хабар беришича, «Барселона» Альваресга муносиб муқобил сифатида «ПСЖ» ҳужумчиси Гонсалу Рамушни танлаган. Маълум бўлишича, португалиялик футболчини тахминан 30 миллион евро эвазига сотиб олиш имконияти мавжуд. Бу эса молиявий қийинчиликларни бошдан кечираётган «кўк-анорранглилар» учун жуда манфаатли вариант ҳисобланади.
Маълумот ўрнида, 24 ёшли Гонсалу Рамушнинг бозор қиймати Transfermarkt портали томонидан 35 миллион еврога баҳоланган. Агар «Барселона» Альварес бўйича келишувга эриша олмаса, бор эътиборини Париж клуби форвардига қаратади.
