«Манчестер Юнайтед» ва «Манчестер Сити» жамоаларининг етакчилари — Бруну Фернандеш ҳамда Бернарду Силва тез орада жамоадошга айланиши мумкин.
Fanatik нашрига таяниб Transfer News Live хабар беришича, ҳар икки португалиялик юлдузга Туркиянинг «Галатасарай» клуби жиддий қизиқиш билдирмоқда. Истанбул клуби раҳбарияти ушбу ярим ҳимоячиларни қўлга киритиш орқали Европа футболи элитасида ўз ўрнини мустаҳкамлаш ниятида. Турклар ҳар икки футболчи учун «сахий» таклиф тайёрлаётгани айтилмоқда.
Маълумот учун, 31 ёшли Бруну Фернандешнинг «қизил иблислар» билан амалдаги шартномаси 2027 йилгача мўлжалланган. Transfermarkt портали унинг қийматини 40 миллион еврога баҳолаган. Бернарду Силва эса мавсум якунида «шаҳарликлар» билан тугаётган шартномасини узайтирмоқчи эмас ва жамоани эркин агент сифатида тарк этиши кутилмоқда.
