O‘zbekistonning amaldagi chempioni Toshkentning “Lokomotiv” jamoasi “Metallurg”ning eng noqulay raqiblardan biri sanaladi.
Mazkur jamoalar O‘zbekiston chempionati oliy ligasi doirasida bugunga qadar o‘zaro 30 bor maydonga chiqishgan bo‘lishsa, mazkur uchrashuvlardan 4 tasida “Metallurg” g‘alaba qozongan. 8 ta uchrashuvda tomonlar ochkolarni bo‘lib olishgan. 18 ta o‘yinda esa omad temiryo‘lchilar tomonida bo‘lgan. Kiritilgan va o‘tkazib yuborilgan to‘plar farqi – 24:54, toshkentliklar foydasiga.
Quyida mazkur jamoalarning Bekobodda o‘tkazilgan so‘nggi oltita uchrashuvi natijalari bilan tanishing:
14.09.2018 “Metallurg” – “Lokomotiv” – 0:1
26.05.2018 “Metallurg” – “Lokomotiv” – 2:0
18.08.2017 “Metallurg” – “Lokomotiv” – 1:2
25.06.2016 “Metallurg” – “Lokomotiv” – 3:3
12.03.2015 “Metallurg” – “Lokomotiv” – 0:0
05.08.2010 “Metallurg” – “Lokomotiv” – 1:0
Tanishing, raqibimiz – “Lokomotiv”!
O‘zbekiston XXVIII milliy chempionati – Coca Cola Superliganing 8-turidagi raqibimiz – Toshkentning “Lokomotiv” jamoasi mamlakatimizning amaldagi chempioni hisoblanadi. O‘tgan mavsum poytaxtliklar qatorasiga uchinchi marta g‘oliblikni qo‘ldan boy berishmadi. “Lokomotiv” shuningdek, uch karra mamlakat vise-chempioni (2013, 2014, 2015), O‘zbekiston kubogi (2014, 2016, 2017), Superkubogi (2015, 2019) sohibi ham hisoblanadi. Oxirgi yillarda “Lokomotiv” xalqaro maydonlarda mamlakatimiz sharafini himoya etib kelmoqda, OFK chempionlar ligasi chorak finali ishtirokchisi (2016) bo‘lgan.
Temiryo‘lchilar oliy liga bahslarida bugungacha 405 ta o‘yin o‘tkazishgan bo‘lib, shulardan 209 tasida g‘alaba qozonishgan. Ular ishtirokidagi 80 o‘yin durang natija bilan tugagan bo‘lsa, 116 uchrashuvda imkoniyatni boy berishgan. “Lokomotiv” raqiblari darvozasini 682 marta ishg‘ol etgan holda, o‘z darvozalaridan 463 ta to‘p olib chiqishgan.
Jamoaning milliy chempionatlarimizdagi eng yirik hisobdagi g‘alabasi – 7:0 (2015 – “So‘g‘diyona”, 2017 – “Obod”). Eng yirik mag‘lubiyati – 1:7 (2006 – “Paxtakor”). “Lokomotiv”ning bitta mavsumda eng ko‘p gol kiritgan futbolchisi Marat Bikmayev hisoblanadi. U 2017 yili raqiblar darvozasiga 27 ta to‘p kiritgandi.
"Metallurg" matbuot xizmati.
