Ўзбекистоннинг амалдаги чемпиони Тошкентнинг “Локомотив” жамоаси “Металлург”нинг энг ноқулай рақиблардан бири саналади.
Мазкур жамоалар Ўзбекистон чемпионати олий лигаси доирасида бугунга қадар ўзаро 30 бор майдонга чиқишган бўлишса, мазкур учрашувлардан 4 тасида “Металлург” ғалаба қозонган. 8 та учрашувда томонлар очколарни бўлиб олишган. 18 та ўйинда эса омад темирйўлчилар томонида бўлган. Киритилган ва ўтказиб юборилган тўплар фарқи – 24:54, тошкентликлар фойдасига.
Қуйида мазкур жамоаларнинг Бекободда ўтказилган сўнгги олтита учрашуви натижалари билан танишинг:
14.09.2018 “Металлург” – “Локомотив” – 0:1
26.05.2018 “Металлург” – “Локомотив” – 2:0
18.08.2017 “Металлург” – “Локомотив” – 1:2
25.06.2016 “Металлург” – “Локомотив” – 3:3
12.03.2015 “Металлург” – “Локомотив” – 0:0
05.08.2010 “Металлург” – “Локомотив” – 1:0
Танишинг, рақибимиз – “Локомотив”!
Ўзбекистон XXVIII миллий чемпионати – Coca Cola Суперлиганинг 8-туридаги рақибимиз – Тошкентнинг “Локомотив” жамоаси мамлакатимизнинг амалдаги чемпиони ҳисобланади. Ўтган мавсум пойтахтликлар қаторасига учинчи марта ғолибликни қўлдан бой беришмади. “Локомотив” шунингдек, уч карра мамлакат вице-чемпиони (2013, 2014, 2015), Ўзбекистон кубоги (2014, 2016, 2017), Суперкубоги (2015, 2019) соҳиби ҳам ҳисобланади. Охирги йилларда “Локомотив” халқаро майдонларда мамлакатимиз шарафини ҳимоя этиб келмоқда, ОФК чемпионлар лигаси чорак финали иштирокчиси (2016) бўлган.
Темирйўлчилар олий лига баҳсларида бугунгача 405 та ўйин ўтказишган бўлиб, шулардан 209 тасида ғалаба қозонишган. Улар иштирокидаги 80 ўйин дуранг натижа билан тугаган бўлса, 116 учрашувда имкониятни бой беришган. “Локомотив” рақиблари дарвозасини 682 марта ишғол этган ҳолда, ўз дарвозаларидан 463 та тўп олиб чиқишган.
Жамоанинг миллий чемпионатларимиздаги энг йирик ҳисобдаги ғалабаси – 7:0 (2015 – “Сўғдиёна”, 2017 – “Обод”). Энг йирик мағлубияти – 1:7 (2006 – “Пахтакор”). “Локомотив”нинг битта мавсумда энг кўп гол киритган футболчиси Марат Бикмаев ҳисобланади. У 2017 йили рақиблар дарвозасига 27 та тўп киритганди.
"Металлург" матбуот хизмати.
