Prezidentimiz joriy yil 19 fevral kuni Sirdaryo viloyatiga tashrifi chog‘ida Xovos tumani oqsoqollari bilan uchrashuvda mehnat va sport faxriylari tumanning eng chekka qishlog‘ida yoshlar uchun sport majmuasi qurib berishni so‘ragan edi.
Ana shu ezgu istak ijrosini ta’minlash maqsadida yangidan barpo etilgan Xovovs tumani bolalar-o‘smirlar sport maktabining tantanali ochilish marosimida jismoniy tarbiya va sport vazirligi, viloyat, tuman hokimliklari, davlat va jamoat tashkilotlari vakillari, sportchilar, yoshlar hamda ommaviy axborot vositalarining xodimlari ishtirok etdi.
Manzilli dastur asosida Jahongir Keldiyev rahbarligidagi “Fregat” qurilish firmasi tomonidan bir kunlik qatnov kuvvati 520 nafar sportchini qabul qilishga ega bo‘lgan yangi zamonaviy 2-TIP sport majmuasi qurilib foydalanishga topshirildi.
Stadion yonidan yoshlarning yopiq futbol, basketbol, voleybol, gandbol, tennis, stol tennisi, boks, sharq yakka kurashi bilan shug‘ullanishi uchun arenalar yangidan barpo etildi.
Mazkur sport inshootlarini qurish uchun 4 milliard 898 million 778 ming so‘m mablag‘ sarflandi. Majmuada 15 sport turidan tashqari yana 5 ta olimpiya sport turlari jumladan, yengil atletika, erkin kurash, yunon-rum kurashi, kamondan o‘q otish, og‘ir atletika bo‘yicha to‘garaklar ham tashkil etilishi ko‘zda tutilgan. Endi yaqin kelajakda sport majmuasida bir yo‘la 1 ming 100 nafar bolalar, o‘smirlar, yoshlar sport bilan shug‘ullanishi mumkin.
– Sport majmuasi atrofi obodonlashtirilib, manzarali daraxt va turli gul ko‘chatlari ekilgani, o‘rindiqlar o‘rnatilgani ayni muddao bo‘ldi, – deydi futbol bo‘yicha O‘zbekiston milliy terma jamoasi a’zosi, xovoslik Lutfilla To‘rayev. – Bu o‘z navbatida aholiga yaratilgan yana bir qulaylik. Qishloq ahli bo‘sh vaqtida bu yerda sayr qilib madaniy hordiq chiqaradi, sport turlari bilan shug‘ullanadi. Biz bunday inshootlarni faqat Toshketga borib ko‘rganmiz.
Xovos tumani bolalar-o‘smirlar sport maktabi ixtiyoriga berilgan mazkur inshootda bir kunda 500 nafardan ortiq o‘g‘il-qiz sportning 20 ga yaqin turlari sir-asrorlarini tajribali murabbiylardan o‘rganishlari uchun barcha sharoitlar yaratilgan.
