Coca Cola Cuperliga 9-turi doirasidagi “Navbahor” – “Metallurg” jamoalari o‘rtasidagi uchrashuvdan oldin  “lochinlar” sardori Jahongir Mehmonov bo‘lajak o‘yin borasida o‘z fikrlarini bildirib, jumladan, shunday dedi:

“Metallurg”- jiddiy raqib va jamoamizdan bor-yo‘g‘i bir ochko kam jamg‘argan holda, turnir jadvalida 7-pog‘onani egallab turibdi. Shu bois,bo‘lajak bahsda bekobodliklar bizga munosib qarshilik ko‘rsatishga harakat qilishadi. Shunday ekan, bo‘lajak o‘yinning keskin   kurashlar ostida hamda shiddatli tarzda kechishi ehtimoli yuqori. Shuning uchun mazkur uchrashuvga ancha puxta va jiddiy tayyorgarlik ko‘rdik.

Jamoamiz uchun qadrli bo‘lgan maydonda, stadion to‘la muxlislarning qo‘llab-quvvatlashlari ostida o‘ynashning gashti baribir boshqacha. Biz – ushbu o‘yinda g‘alaba qozonib, ishqibozlarga quvonch ulashish uchun barcha imkoniyatimizni ishga solamiz.     

Ayni paytda jamoamizda a’lo kayfiyat hukmron.

Bekobodliklar bilan bo‘ladigan uchrashuvdan keyin ham ushbu kayfiyatni saqlab qolmoqchimiz hamda o‘z yutug‘imiz bilan  muqaddas Ramazon oyida  muxlislarning uylariga xursand holda qaytishlariga munosib hissamizni qo‘shish niyatidamiz.

Ishqibozlar ham bo‘lajak bahsda jamoamizni munosib va ajoyib tarzda qo‘llab-quvvatlashsa bo‘lgani. 

“Navbahor” PFK matbuot xizmati.