Coca Cola Cуперлига 9-тури доирасидаги “Навбаҳор” – “Металлург” жамоалари ўртасидаги учрашувдан олдин “лочинлар” сардори Жаҳонгир Меҳмонов бўлажак ўйин борасида ўз фикрларини билдириб, жумладан, шундай деди:
“Металлург”- жиддий рақиб ва жамоамиздан бор-йўғи бир очко кам жамғарган ҳолда, турнир жадвалида 7-поғонани эгаллаб турибди. Шу боис,бўлажак баҳсда бекободликлар бизга муносиб қаршилик кўрсатишга ҳаракат қилишади. Шундай экан, бўлажак ўйиннинг кескин курашлар остида ҳамда шиддатли тарзда кечиши эҳтимоли юқори. Шунинг учун мазкур учрашувга анча пухта ва жиддий тайёргарлик кўрдик.
Жамоамиз учун қадрли бўлган майдонда, стадион тўла мухлисларнинг қўллаб-қувватлашлари остида ўйнашнинг гашти барибир бошқача. Биз – ушбу ўйинда ғалаба қозониб, ишқибозларга қувонч улашиш учун барча имкониятимизни ишга соламиз.
Айни пайтда жамоамизда аъло кайфият ҳукмрон.
Бекободликлар билан бўладиган учрашувдан кейин ҳам ушбу кайфиятни сақлаб қолмоқчимиз ҳамда ўз ютуғимиз билан муқаддас Рамазон ойида мухлисларнинг уйларига хурсанд ҳолда қайтишларига муносиб ҳиссамизни қўшиш ниятидамиз.
Ишқибозлар ҳам бўлажак баҳсда жамоамизни муносиб ва ажойиб тарзда қўллаб-қувватлашса бўлгани.
“Навбаҳор” ПФК матбуот хизмати.
