«Yuventus» klubi va’da qilgan super futbolchilarni hali beri o‘z tarkibiga qo‘shib olganicha yo‘q. Klub direktori yangi mavsumda jamoa bir nechta yangi futbolchilar bilan ishtirok etishi borasida bayonot bergan edi. So‘nggi kunlarda «Yuve»ning bor e’tibori «Liverpul» klubi hujumchisi Salahga qaratilganidan xabaringiz bor. «Keksa seniora» uni qo‘lga kiritish uchun «Liverpul» klubiga Dibalani qo‘shib berishga ham tayyorligini rasman e’lon qildi. Salahning o‘zi ham Italiyada to‘p surishga qarshi emas. Uning jamoadoshlari bu masalada qanday fikrda? Bugun aynan shu savolga javob topishga urunib ko‘ramiz.
Jeyms Milner
«Liverpul» kuchli va qudratli klub. Bu jamoada yuqori saviyadagi futbolchilar to‘p suradi. Shunday bo‘lsada, Muhammad ulardan bir bosh balandroq desam, adashmagan bo‘laman. Sababi, eng muhim pallalarda u ma’suliyatni o‘z bo‘yniga ola biladi va bu ishni juda yaxshi uddalaydi. Men uning klubda qolish yoki ketish borasidagi istalgan tanlovini qo‘llab-quvvatlayman. Har qanday futbolchi uchun kuchli klublarda to‘p surish doimo yoqimli bo‘lib kelgan. Agarda, u ketadigan bo‘lsa, men uni faqat yoqimli xotiralar bilan eslab yuraman.
Nabi Keyta
Salah maydon ichida ham, tashqarisida ham yaxshi inson. Uning mehnatkashligiga qoyil qolmasdan ilojingiz yo‘q. U alohida mashq o‘tkazishni istasa, doimo meni birga mashq qilishga taklif qiladi. U meni o‘sishimni istaydi. To‘g‘risini aytsam, u meni o‘z ukasidek ko‘radi va doimo o‘z maslahatlarini ayamaydi. Muhammadning atrofida mish-mishlar tobora ko‘payib borayotganidan xabarim bor. Bu odatiy hol. Sababi, Salah o‘z pozisiyasida dunyoning eng kuchli futbolchilaridan biri. Agarda unga «Yuventus» yoki «Real Madrid» singari klublardan taklif tushsa, men hayron bo‘lmayman. Istalgan klub uni o‘z tarkibida ko‘rishni xohlaydi.
Alison
U ajoyib futbolchi. Uning to‘p bilan muomala qilishini tomosha qilish doimo zavqlidir. Salah o‘yin tashqarisida ortiqcha gapirmaydi va hammasini maydonda ko‘rsatadi. Uni shuning uchun ham xurmat qilaman. Mashg‘ulotlarda ko‘pincha unga qarshi o‘ynashga to‘gri keladi. Yashirib o‘tirmayman , bu juda mushkul. Gap shundaki, uning nima qilmoqchi ekanligini oldindan bilishning sira iloji yo‘q. Salahning «Yuventus»ga o‘tishi borasida shubham bor. Sababi, hozir uni hamma narsa qoniqtirmoqda. Ayni damda bir o‘zimizning eng yuqori darajamizga chiqib boryapmiz va bizda yana sovrinlarni qo‘lga kiritish imkoni mavjud.
Virjil van Deyk
Agarda Salah o‘z o‘yinini kuchaytirishni istasa, jamoada qolishi shart va «Yuventus»ning taklifini unutishi lozim. Biz Klopp qo‘l ostida ko‘plab sovrinlarni qo‘lga kiritishimiz mumkin. Hozir bizda bunday imkoniyat mavjud va biz bundan foydalanashimiz kerak. Uning «Yuventus»ga o‘tishi borasidagi mish-mishlar tobora haqiqatga aylanib bormoqda. Men o‘z so‘zlarimni yana qaytaraman: u boshqa klubga o‘tmasligi zarur. Ayniqsa, «Yuve»ga! Gap shundaki, «Yuventus»da Ronaldu bor va u juda manman yigit. Jamoaning o‘yini aynan portugaliyalikning atrofida quriladi. Bunday sxemada Salahning o‘yini ochilib ketmasligi aniq. Salah aqilli yigit. O‘ylaymanki, u o‘zi uchun to‘g‘ri qaror qabul qila oladi.
