«Ювентус» клуби ваъда қилган супер футболчиларни ҳали бери ўз таркибига қўшиб олганича йўқ. Клуб директори янги мавсумда жамоа бир нечта янги футболчилар билан иштирок этиши борасида баёнот берган эди. Сўнгги кунларда «Юве»нинг бор эътибори «Ливерпул» клуби ҳужумчиси Салаҳга қаратилганидан хабарингиз бор. «Кекса сениора» уни қўлга киритиш учун «Ливерпул» клубига Дибалани қўшиб беришга ҳам тайёрлигини расман эълон қилди. Салаҳнинг ўзи ҳам Италияда тўп суришга қарши эмас. Унинг жамоадошлари бу масалада қандай фикрда? Бугун айнан шу саволга жавоб топишга уруниб кўрамиз.
Жеймс Милнер
«Ливерпуль» кучли ва қудратли клуб. Бу жамоада юқори савиядаги футболчилар тўп суради. Шундай бўлсада, Муҳаммад улардан бир бош баландроқ десам, адашмаган бўламан. Сабаби, энг муҳим паллаларда у маъсулиятни ўз бўйнига ола билади ва бу ишни жуда яхши уддалайди. Мен унинг клубда қолиш ёки кетиш борасидаги исталган танловини қўллаб-қувватлайман. Ҳар қандай футболчи учун кучли клубларда тўп суриш доимо ёқимли бўлиб келган. Агарда, у кетадиган бўлса, мен уни фақат ёқимли хотиралар билан эслаб юраман.
Наби Кейта
Салаҳ майдон ичида ҳам, ташқарисида ҳам яхши инсон. Унинг меҳнаткашлигига қойил қолмасдан иложингиз йўқ. У алоҳида машқ ўтказишни истаса, доимо мени бирга машқ қилишга таклиф қилади. У мени ўсишимни истайди. Тўғрисини айтсам, у мени ўз укасидек кўради ва доимо ўз маслаҳатларини аямайди. Муҳаммаднинг атрофида миш-мишлар тобора кўпайиб бораётганидан хабарим бор. Бу одатий ҳол. Сабаби, Салаҳ ўз позициясида дунёнинг энг кучли футболчиларидан бири. Агарда унга «Ювентус» ёки «Реал Мадрид» сингари клублардан таклиф тушса, мен ҳайрон бўлмайман. Исталган клуб уни ўз таркибида кўришни хоҳлайди.
Алисон
У ажойиб футболчи. Унинг тўп билан муомала қилишини томоша қилиш доимо завқлидир. Салаҳ ўйин ташқарисида ортиқча гапирмайди ва ҳаммасини майдонда кўрсатади. Уни шунинг учун ҳам хурмат қиламан. Машғулотларда кўпинча унга қарши ўйнашга тўгри келади. Яшириб ўтирмайман , бу жуда мушкул. Гап шундаки, унинг нима қилмоқчи эканлигини олдиндан билишнинг сира иложи йўқ. Салаҳнинг «Ювентус»га ўтиши борасида шубҳам бор. Сабаби, ҳозир уни ҳамма нарса қониқтирмоқда. Айни дамда бир ўзимизнинг энг юқори даражамизга чиқиб боряпмиз ва бизда яна совринларни қўлга киритиш имкони мавжуд.
Виржил ван Дейк
Агарда Салаҳ ўз ўйинини кучайтиришни истаса, жамоада қолиши шарт ва «Ювентус»нинг таклифини унутиши лозим. Биз Клопп қўл остида кўплаб совринларни қўлга киритишимиз мумкин. Ҳозир бизда бундай имконият мавжуд ва биз бундан фойдаланашимиз керак. Унинг «Ювентус»га ўтиши борасидаги миш-мишлар тобора ҳақиқатга айланиб бормоқда. Мен ўз сўзларимни яна қайтараман: у бошқа клубга ўтмаслиги зарур. Айниқса, «Юве»га! Гап шундаки, «Ювентус»да Роналду бор ва у жуда манман йигит. Жамоанинг ўйини айнан португалияликнинг атрофида қурилади. Бундай схемада Салаҳнинг ўйини очилиб кетмаслиги аниқ. Салаҳ ақилли йигит. Ўйлайманки, у ўзи учун тўғри қарор қабул қила олади.
