«Barselona» klubi hujumchi Lionel Messi bilan shartnomani uzaytirmoqchi. Bu haqda ESPN telekanali xabar tarqatdi.
Argentinalik futbolchining hozirgi shartnomasi 2021 yilda yakuniga yetadi. Mazkur shartnomada kelishuvni avtomatik ravishda yana bir yilga uzaytirish bandi bo‘lishiga qaramay, "ko‘k-anorranglilar" rahbariyati Messi bilan 2023 yilga qadar mo‘ljallangan yangi shartnoma imzolashni maqsad qilmoqda. «Barselona» prezidenti Jozep Bartomeu Messining otasi bilan muzokaralarni boshlashga tayyor.
Agar yangi shartnoma imzolansa, bu «Barselona» va Leo o‘rtasidagi 10-shartnoma bo‘ladi. Messi Yevropa chempionlar ligasida g‘olib chiqishni istamoqda. Bu maqsad yo‘lida rahbariyat unga jamoani kuchaytirishni va’da bermoqda.
Lionel Messi faoliyati davomida faqat «Barselona» sharafini himoya qilib kelmoqda. U 2004 yilda klubda debyut qilgan. Bu vaqt davomida futbolchi 687ta o‘yinda maydonga tushib, 603ta gol urgan.