«Барселона» клуби ҳужумчи Лионель Месси билан шартномани узайтирмоқчи. Бу ҳақда ESPN телеканали хабар тарқатди.

Аргентиналик футболчининг ҳозирги шартномаси 2021 йилда якунига етади. Мазкур шартномада келишувни автоматик равишда яна бир йилга узайтириш банди бўлишига қарамай, "кўк-анорранглилар" раҳбарияти Месси билан 2023 йилга қадар мўлжалланган янги шартнома имзолашни мақсад қилмоқда. «Барселона» президенти Жозеп Бартомеу Мессининг отаси билан музокараларни бошлашга тайёр.

Агар янги шартнома имзоланса, бу «Барселона» ва Лео ўртасидаги 10-шартнома бўлади. Месси Европа чемпионлар лигасида ғолиб чиқишни истамоқда. Бу мақсад йўлида раҳбарият унга жамоани кучайтиришни ваъда бермоқда.

Лионель Месси фаолияти давомида фақат «Барселона» шарафини ҳимоя қилиб келмоқда. У 2004 йилда клубда дебют қилган. Бу вақт давомида футболчи 687та ўйинда майдонга тушиб, 603та гол урган.