«Bunyodkor»ning Minskdagi o‘quv-yig‘in mashg‘ulotlari davomida jamoaga kelib qo‘shilgan ukrainalik yarim himoyachi Yevgeniy Chumakning harakatlari ko‘pchilikka manzur bo‘ldi. Futbolchining taqdiriga shu kunlarda oydinlik kiritiladi. Biz Chumakning fikrlari bilan qiziqdik.
- Murabbiy, futbolchilar menga juda manzur bo‘ldi. Jamoada do‘stona kayfiyat hukmron ekan. Barcha meni iliq qabul qildi. Bosh murabbiyning ishga bo‘lgani munosabati ajoyib. Garchi jamoaga kelib qo‘shilganimga hali ko‘p bo‘lmagan bo‘lsa-da, o‘zimni juda yaxshi his qilyapman.
Bosh murabbiy futbolchilardan ko‘proq pas o‘ynashni talab qilar ekan. Bunisi juda muhim. Sababi, maydonda to‘pni shunchaki tepib yuborib, mo‘jiza kutmasdan, ochiq zonalarga ochilasiz yoki o‘zingiz ochiq zonadagi jamoadoshingizni izlab topib, to‘pni unga topshirasiz. Yoki to‘pni qisqa masofalarga oshirish orqali hujumga o‘tasiz.
Yig‘in davomidagi so‘nggi ikki uchrashuvni birida yutqazdik, ikkinchisida durang o‘ynadik. Buni charchoq bilan bog‘lagan bo‘lardim. Yigitlar oxirgi kunlarda har kuni o‘rtoqlik uchrashuvida maydonga tushishdi. Charchoq bo‘lishi tabiiy. Chunki futbolchi ham inson, robotmas. Qolaversa, yig‘in o‘tkazishdan maqsad o‘rtoqlik uchrashuvida g‘alaba qozonish emas, balki kamchiliklarni bilishdir. Shuning uchun bundan xavotir olmaslik kerak.
Bu yerga kelishimdan avval Aleksandr Pishur bilan suhbatlashgandim. U «Bunyodkor» haqida juda ko‘p iliq fikrlarni bildirgandi. Nasib qilsa, jamoada o‘ynashga loyiq ekanligimni isbotlayman.
