Professional boksning super yengil (-63,5 kg) vazn toifasida ringga chiqayotgan Shahram G‘iyosov (8-0, 6 KO) avgust oyida o‘zining 9-jangini o‘tkazadi.
GoSport.uz internet-nashri manbalari bergan xabarga ko‘ra, 24 avgust kuni bo‘lib o‘tadigan jangda G‘iyosovga o‘ta tajribali raqib — sobiq jahon chempioni Darlis Peres (34-4-2, 22 KO) raqiblik qiladi. Jang avval xabar berilganidek Meksikada bo‘lib o‘tadi.
Ma’lumot uchun, to‘liq ismi-sharifi Darley Gregorio Peres Ballestas bo‘lgan 35 yoshli bokschi 10 yildan buyon professional boksda faoliyat yuritib keladi. U bu davr mobaynida yengil (-61,2 kg) vazn toifasining WBA yo‘nalishida 2014-15 yillarda uch marta vaqtinchalik jahon chempionlik kamarini qo‘lga kiritgan. 2015 yilda doimiy jahon chempionlik kamari uchun jangda Entoni Krollani ochkolar hisobida mag‘lubiyat uchratgan, ammo 11-raunddan undan ikki ochko olib tashlangani bois, jangda durang natija e’lon qilingan. Revansh jangida esa Peres imkoniyatni boy berib qo‘ygan.
Shu paytgacha u 4 bor yutqazgan bo‘lsa, barchasida kuchli raqiblar Yuriokis Gamboa, Entoni Krolla Lyuk Kempbell va endilikda marhum Maksim Dadashev ga Imkoniyatni boy bergan. Hozir super yengil vazn toifasining WBO chempionlik kamari sohibi Moris Hukerga qarshi jangda durang qayd etgan.
Eslatib o‘tamiz, so‘nggi marta G‘iyosov 26 aprel kuni Inglvudda bo‘lib o‘tgan boks oqshomida amerikalik Emanuel Teylorni (20-6, 14 KO) mag‘lubiyatga uchratib, WBA International chempionlik kamarini qo‘lga kiritgandi.
