Coca Cola Superligasi 16-tur doirasidagi "Dinamo" - "Qo‘qon-1912" uchrashuvidan keyingi matbuot anjumanining birinchi qismida “Qo‘qon-1912” jamoasi bosh murabbiyi vazifasini bajaruvchisi Aziz To‘xtaboyev ishtirok etdi.
- Barcha hamyurtlarimizni jamoamiz nomidan kirib kelayotgan iydi Qurbon bayrami bilan muborakbod etamiz.Bugungi g‘alabamiz muxlislarimizga bayram sovg‘asi bo‘ldi. O‘yin borasida aytadigan bo‘lsam, bugungi bahs qiyin kechishini bilardik. Shunga yarasha tayyorgarlik ko‘rdik. Bizga bitta g‘alaba yetishmayotgandi. Mana, bugun uni qo‘lga kiritdik.
Sobit Sindarovni yaxshi bilganimiz bois uning birinchi sariq kartochkasidan keyin almashtirmaslikka qaror qilgandik. Uning o‘yinga chanqoq ekanligi sababli Sindarovga imkoniyat berdik. Futbolda shunday holatlar bo‘lib turadi.
Timur Kapadzeni yozda jamoamizga taklif etgandik. Uning oldida muhim vazifalar borligi uchun rad javobini bergandi. Hozir esa jamoamizga o‘zining qimmatli maslahatlarini berib kelmoqda.
Bugungi o‘yin uchun maxsus reja ishlab chiqqandik. Negaki, raqibimiz o‘z maydonidagi uchrashuvlarda ko‘proq hujumkorlikka zo‘r berayotgandi. Shu bois besh nafar himoyachi bilan o‘yinni boshladik. Rejamiz ish berganidan xursandmiz.
