Sir emaski, yurtimizda velosport jadal ommalashib borayotgan sport turlaridan biri. Bunga hamyurtlarimiz xalqaro musobaqalarda qayd etayotgan natijalar yaqqol misol. Tokio Olimpiadasiga qo‘lga kiritilgan lisenziyalardan biri ham aynan ushbu sport turidan ekanini unutmagan bo‘lsangiz kerak.
Xalqaro velosportchilar ittifoqining so‘nggi yangilangan reytingi o‘zbek sporti uchun muhim ahamiyat kasb etadi. Zero, unda hamyurtimiz Murodjon Xolmurodov velotrekning ochkolar bo‘yicha jamoaviy yo‘nalishida jahon reytingining uchinchi pog‘onasida qayd etilgan. Bu hodisa o‘zbek velosporti tarixida ilk bor kuzatilmoqda. 37 yoshli sportchimiz hisobida 1337.5 ochko mavjud. Ayni shu yo‘nalishning ayollar toifasida esa Tokio Olimpiadasiga yo‘llanma olib ulgurgan Olga Zabelinskaya 1200 ochko bilan to‘rtinchi pog‘onada qayd etilgan.
