Futbol yildan-yilga rivojlanib bormoqda. Shu bilan birga futbol qoidalari ham takomillashib, yangilab borilmoqda.

Oxirgi yillarda FIFA futbol o‘yini jozibasiga ta’sir qiluvchi omillarga qarshi kurash olib bormoqda hamda quyidagi holatlar uchun futbolchilarni moliyaviy jarimaga tortmoqda.

- Simulyasiya (mug‘ombirlik);

- O‘yin vaqtini atayin cho‘zish;

- Hakamning qaroriga so‘z yoki ishoralar bilan e’tiroz bildirish.


O‘zbek futbolida ham bunday vaziyatlar ko‘payib borayotgani hech kimga sir emas. Masalan, g‘olib bo‘layotgan jamoa darvozaboni to‘pni o‘yinga kiritish paytida atayin vaqt cho‘zsa, oddiy muxlisga bu yoqadimi? Yoki futbolchi penalti ishlayman deb raqib jarima maydoni ichida aktyorlik ishlatib yiqilib tushaversa bu futbolga foyda keltiradimi? Yoki bo‘lmasa Superligada ishlayotgan mahalliy hakamlar bilan har bir bahsli vaziyatda tortishadigan futbolchilar ertaga terma jamoalarimiz safida xalqaro o‘yinlarda ishtirok etishsa va chet ellik hakamlar bilan shunday qilib jamoamizni og‘ir ahvolga solib qo‘yishsa, bu bizga pand berib qo‘ymaydimi?

Shu bois ham futbol jamoatchiligi tomonidan yuqoridagi holatlar uchun O‘zbekistonda ham futbolchilarni moliyaviy jarimaga tortish taklifi o‘rtaga tashlanmoqda.

Xo‘sh, sizningcha O‘zbekistonda ham FIFA qabul qilgan qoidani tatbiq etish to‘g‘ri bo‘ladimi yoki yo‘q? Fikrlaringizni yozib qoldiring.