«Inter» hujumchisi Mauro Ikardi faoliyatini «PSJ»da davom ettiradigan bo‘ldi. 26 yoshli futbolchi «neradzurri» bilan shartnomani 2022 yilgacha uzaytirdi va ijara asosida Parijga yo‘l oldi.

«Pari Sen-Jermen» safida u 8 million yevro yillik maosh oladi. Bundan tashqari, klubdagi ishtirokiga qarab yana 2 million yevro mukofotlar nazarda tutilgan. Fransiyaliklar kelasi yilning yozida uni 70 million yevroga sotib olish imkoniyatiga ega bo‘lishdi.

Agar argentinalik futbolchi ijara muddati yakunlanganidan keyin «Inter»ga qaytsa, 2020/21 mavsumda uning maoshi 5 million yevro, 2021/22 mavsumda esa 7 million yevro teng bo‘ladi.

Kecha Ikardi «PSJ»da tibbiy ko‘rikdan o‘tdi va jamoa bilan shartnoma imzoladi. Parijliklar bir yillik ijara uchun "Inter"ga qancha pul to‘lashi haqida ma’lumot tarqatilmadi.

Hujumchi o‘tgan mavsum davomida vaqtinchalik jamoa mashg‘ulotlaridan chetlatilib, «Inter» sardorlik bog‘ichidan mahrum qilindi. Jamoaning yangi bosh murabbiyi Antonio Konte ham Ikardi kerak emasligini ma’lum qildi. Shundan so‘ng milanliklar u bilan xayrlashishga qaror qilishdi.

"PSJ" esa hujumchilar — Edinson Kavani va Kilian Mbappe jarohat olib, bir oyga safdan chiqqanidan keyin zudlik bilan hujumchi qidirishga tushdi va Ikardi variantida to‘xtaldi.