Chet ellik murabbiy bir necha million dollarlik kompensasiya pulini olib, futbol uyushmasining shundoq ham teshik g‘aznasini bo‘shatib ketganidan keyin uning o‘rnida kim ishlashi mumkin? Albatta, Vadim Abramov.

U 2003 yili bankrotlik yoqasida turgan, bir tiyin puli yo‘q, Oliy Ligadan tushib ketishi en aniq bo‘lib turgan “Traktor”ni ikkinchi davrada qabul qilib olib, Ikkinchi Ligadan chiqqan to‘rtinchi sort futbolchilar bilan chempionatda olib qolgan edi. Keyin nima bo‘lganini esingizdami? Bir tiyin puli yo‘q shu “Traktor” 2004 yili 5-o‘rinni, 2005 yili 4-o‘rinni egallagan, Kubok finalining ikkinchi taymida “Paxtakor”dan sovrinni ilib ketishiga bir bahya qolgan.

U 2019 yili avvalgi rahbariyati tomonidan bor budi talon-toroj qilib bo‘lingan, bir tiyin puli yo‘q “Bunyodkor”ni qabul qilib olib, yosh bolalar bilan Superligada uchinchi bo‘ldi. Chempionatning birinchi davrasida-ku necha bor hayron qoldirdi kutilmagan natijalari bilan. “Yo‘q bo‘lib ketadi, tarqalib ketadi, faqat yutqazadi endi” deyilgan kollektivni tuppa-tuzuk, futbol o‘ynashni biladigan jamoaga aylantira oldi. Xullas, Vadim Abramov shunaqa.

Vadim Abramovning bitta kamchiligi bor (agar buni kamchilik deyish mumkin bo‘lsa) — u bir tomondan omadli (“Traktor”, “Bunyodkor” bilan qilgan ishlari haqida o‘qing yana bir bor), boshqa tomondan g‘irt omadsiz; og‘zi endi oshga yetganida nuqul yer tishlab qoladi — o‘sha “Traktor” bilan bo‘lgan tarix bunga dalil, Avstraliyaga qarshi 0:6 hisobi bilan tugagan yarim final, BAAga qarshi Olimpiada yo‘llanmasi boy berilgan drama...

Nima bo‘lganida ham, Vadim Karlenichga omad — 2012 yilda tugatishga ulgurmagan “diplom ishi”ni endi zo‘r muvaffaqiyat bilan himoya qilib olishiga tilakdoshman!

Muhrim A’zamxo‘jayev