Ma’lumki, ayni paytda barcha sport turlari bo‘yicha terma jamoamiz vakillari Tokio Olimpiadasiga tayyorgarlik yo‘lida tinimsiz mehnat qilishmoqda. O‘zbekiston Milliy olimpiya qo‘mitasi haftaning dam olish kunlari atletlarimiz uchun qator madaniy tadbirlar tashkil qilib bermoqda.
Jumladan, yakuniga yetgan hafta sinxron suzish bo‘yicha terma jamoamiz vakillari Alisher Navoiy nomidagi Davlat akademik katta teatriga tashrif buyurishdi. Sportchilarimiz u yerda «Kumush» operasini maroq bilan tomosha qildilar. Ma’lumot uchun, sinxronchilarimiz bugun tunda Sungapurga o‘quv-mashg‘ulot yig‘inini o‘tkazish uchun jo‘nab ketishadi.
Shuningdek, Gruziyada o‘quv-mashg‘ulot yig‘inlarini olib borayotgan dzyudo bo‘yicha O‘zbekiston terma jamoasi vakillari uchun Borjomi sihatgohida sayr tashkil qilindi. U yerning shifobaxsh suviga ortiqcha ta’rif berish shart bo‘lmasa kerak. Shu tariqa dzyudochilarimiz mashg‘ulotlardan chalg‘ish bilan birga musaffo tog‘ havosidan bahra olib qaytishdi.
O‘zbekiston Milliy olimpiya qo‘mitasi yurtimiz sharafini munosib himoya qilib kelayotgan sportchilarimizni munosib qo‘llab-quvvatlash yo‘lida mana shunday madaniy tadbirlarni tashkil qilishda davom etadi.
