Маълумки, айни пайтда барча спорт турлари бўйича терма жамоамиз вакиллари Токио Олимпиадасига тайёргарлик йўлида тинимсиз меҳнат қилишмоқда. Ўзбекистон Миллий олимпия қўмитаси ҳафтанинг дам олиш кунлари атлетларимиз учун қатор маданий тадбирлар ташкил қилиб бермоқда.

Жумладан, якунига етган ҳафта синхрон сузиш бўйича терма жамоамиз вакиллари Алишер Навоий номидаги Давлат академик катта театрига ташриф буюришди. Спортчиларимиз у ерда «Кумуш» операсини мароқ билан томоша қилдилар. Маълумот учун, синхрончиларимиз бугун тунда Сунгапурга ўқув-машғулот йиғинини ўтказиш учун жўнаб кетишади.

Шунингдек, Грузияда ўқув-машғулот йиғинларини олиб бораётган дзюдо бўйича Ўзбекистон терма жамоаси вакиллари учун Боржоми сиҳатгоҳида сайр ташкил қилинди. У ернинг шифобахш сувига ортиқча таъриф бериш шарт бўлмаса керак. Шу тариқа дзюдочиларимиз машғулотлардан чалғиш билан бирга мусаффо тоғ ҳавосидан баҳра олиб қайтишди.

Ўзбекистон Миллий олимпия қўмитаси юртимиз шарафини муносиб ҳимоя қилиб келаётган спортчиларимизни муносиб қўллаб-қувватлаш йўлида мана шундай маданий тадбирларни ташкил қилишда давом этади.