«Manchester Siti» yarim himoyachisi Rahim Sterling Angliya terma jamoasining navbatdagi o‘yinini o‘tkazib yuboradi.

The Guardian tarqatgan xabarga ko‘ra, futbolchi «Liverpul» himoyachisi Jo Gomes bilan mojaroga borgani uchun Chernogoriyaga qarshi o‘yindan ishtirok etmaydigan bo‘ldi. Ma’lumotlarga qaraganda, «Liverpul» – «Manchester Siti» o‘yini (3:1) paytida o‘yinchilar o‘zaro tortishib qolishgan va bu holat terma jamoaning mashg‘ulotida ham davom etgan.

Angliya terma jaomasi bosh murabbiyi Garet Sautgeyt ham Sterling vatinchalik termadan chetlatilganini ma’lum qildi.

«Rahimni navbatdagi o‘yin uchun tarkibga kiritmaslikka qaror qildik. Bizning asosiy vazifamiz — klub doirasidagi to‘qnashuvlarni terma jamoaga ko‘chishiga yo‘l qo‘ymaslik. Afsuski, «Liverpul» – «Manchester Siti» o‘yinidagi hissiyot hamon o‘z kuchini yo‘qotmagan. Terma jamoa manfaati uchun biz tutgan yo‘l to‘g‘ri, deb o‘ylayman. Bunday choraga butun tarkib rozi bo‘ldi», – dedi Sautgeyt.

Angliya – Chernogoriya o‘yini 14 noyabr kuni Londondagi «Uembli» stadionida bo‘lib o‘tadi.