Xabaringiz bor, xalqaro tajribadan kelib chiqqan holda, FIFA hamda OFK tavsiyalariga muvofiq, futbol uchrashuvlari vaqtida adolat va shaffoflikni ta’minlash maqsadida O‘zbekistonda ham VAR (Video Assistant Referee – video yordamchi hakam) tizimini joriy etish ko‘zda tutilmoqda.

Shu maqsadda Toshkentda VAR tizimini yo‘lga qo‘yish, ushbu tizimdan samarali foydalanish bo‘yicha seminar boshlangani haqida ma’lumot bergan edik.

FIFA va IFAB mutaxassislari tomonidan mazkur zamonaviy tizimni yo‘lga qo‘yishda e’tibor qaratish lozim bo‘ladigan jihatlar, bunga qadar VAR tizimi joriy etilgan mamlakatlar tajribasidan unumli foydalanish, VAR tizimining foydali jihatlari, ushbu tizimni samarali qo‘llashda operator va hakamlarning ahamiyati bo‘yicha zarur ko‘nikmalar taqdim etilgan seminar yakunlandi.

O‘zbekiston futbol assosiasiyasi tashabbusi bilan tashkil etilgan ushbu seminarda FIFA Hakamlar boshqarmasidan Maykl Bossler, FIFAning futbolda zamonaviy texnologiyalarni tatbiq etish boshqarmasidan Bxveshan Morgen va IFAB vakili Tibo Niysen bu boradagi o‘z bilim va tajribalari bilan o‘rtoqlashishdi.

Qayd etish joiz, FIFA va IFAB tavsiyalariga muvofiq VAR tizimini yo‘lga qo‘yish uchun 7 oydan 12 oygacha vaqt talab etiladi va bu 3 bosqichda amalga tatbiq etiladi. Qolaversa, VAR tizimini to‘liq yo‘lga qo‘yish uchun har jihatdan puxta tayyorgarlik olib borish lozim bo‘ladi. Ya’ni, dastlabki ikki bosqichda bu borada yetarlicha tajribaga ega VAR provayderi bilan hamkorlik yo‘lga qo‘yiladi, ushbu tizim bo‘yicha ishlaydigan mutaxassislar, videoperatorlar tayyorlanadi, stadionlar VAR tizimidan foydalanish uchun moslashtiriladi, VAR bo‘yicha ishlovchi hakamlar malakasi oshiriladi, shuningdek, yakuniy bosqichda futbolchi, murabbiylar, futbol jamoatchiligiga VAR tizimi ishlash tartibi bo‘yicha zarur ma’lumotlar taqdim etiladi. Shundan keyingina VAR tizimidan foydalanish mumkin bo‘ladi.

O‘zbekiston futbol assosiasiyasi FIFA va IFAB tavsiyalariga amal qilgan holda yuqorida sanab o‘tilgan barcha jihatlar bo‘yicha puxta hozirlik ishlari olib boradi. Bu boradagi dastlabki qadamlar allaqachon qo‘yila boshlandi. 21-22 noyabr kunlari tashkil etilgan ushbu seminar davomida VARni yo‘lga qo‘yishda e’tibor qaratish lozim bo‘lgan har bir jihatga batafsil to‘xtalib o‘tildi. Endilikda mazkur tizimni O‘zbekistonda ham joriy etish bo‘yicha keng qamrovli ish olib boriladi va VAR tizimidan rejaga muvofiq tarzda bosqichma-bosqich 2021 yildan boshlab foydalanila boshlanadi.